మనలో ఒకరిగా, ప్రతి పేద కుటుంబానికి పెద్ద దిక్కుగా రాష్ట్ర ప్రజల హృదయాల్లో చిరస్మరణీయ స్థానం సంపాదించిన దివంగత మహానేత, నా తండ్రి డాక్టర్ వై.ఎస్.రాజశేఖరరెడ్డి మన మధ్య లేరంటే ఇప్పటికీ నమ్మాలనిపించటం లేదు. నాతో సమానంగా రాష్ట్ర ప్రజలందరూ ఆయనను నిరంతరం ఏదోరీతిన స్మరించుకుంటూనే ఉన్నారు. ఆ మహానేత అకాలమరణాన్ని జీర్ణించుకోలేక ప్రాణాలు వదిలిన వారి కుటుంబాలను పరామర్శించి, వారి కుటుంబ సభ్యుల్లో ధైర్యం నింపేందుకు నేను వారిదగ్గరకు వెళ్లాలనుకున్నాను. వారిని పలకరించాలని, బాధల్లో ఉన్న వారికి మీకు నేనున్నానంటూ అండగా నిలవాలని,  ప్రతి నెలా రెండు లేదా మూడు జిల్లాలకు వెళ్లాలని నిర్ణయించుకున్నాను. అందులో భాగంగానే మొదటి విడతగా పశ్చిమ గోదావరి, ఖమ్మం జిల్లాల

నుండి ఈ నెల 9న పర్యటన ప్రారంభిస్తున్నాను. ఈ పర్యటనకు ఎలాంటి రాజకీయ ప్రాధాన్యం లేదు. మహానేత కోసం మరణించిన వారి కుటుంబాలను ఓదార్చేందుకు మాత్రమే వారిని కలవాలని, నా వంతు వారికి ధైర్యం చెప్పాలని ఎప్పుడో నిర్ణయించుకున్నాను. కానీ నేనే నా బాధ నుంచి బయటపడటానికి కొంత సమయం తీసుకుంది. కొన్ని పరిస్థితులు అనుకూలించలేదు. ఇచ్చిన మాట ప్రకారం వారిని కలిసి ఆత్మీయతను పంచుకునేందుకు బయలుదేరే సమయం రావడం నాలో ఎంతో ఉద్వేగాన్ని కలిగిస్తోంది. వేదనతో కూడుకున్నదే అయినా వారికి అండగా నిలవాలన్న కాంక్ష నన్ను ముందుకు నడిపిస్తోంది. నా పర్యటనను పార్టీ కార్యకర్తలు, నాయకులు అర్థం చేసుకోగలరని అనుకుంటున్నాను. నా పర్యటనలో ఎక్కడా టపాకాయలు, పూలు, దండల్లాంటి ఆర్భాటాలకు తావివ్వరాదన్నది నా అభిప్రాయం. అలాగే సభలకు, రాజకీయ ఉపన్యాసాలకు దూరంగా ఉండాలన్నది నా అభిమతం. ఎందుకంటే ఇది ఏమాత్రం రాజకీయ పర్యటన కాదు. నాన్నకోసం ప్రాణాలు కోల్పోయిన వారి కుటుంబాలకు ధైర్యాన్నిచ్చేందుకు మాత్రమే. ఈ సందర్భంగా నన్ను కలవడానికో, చూసేందుకో మీ పనులు చెడగొట్టుకోవద్దు. మీ వీలును బట్టి మాత్రమే తప్ప....ప్రత్యేకంగా మీ కార్యకాలు వాయిదా వేసుకుని నాతో పాల్గొనాల్సిన ఒత్తిడి లేదు. ఎవరైనా పార్టీలకు, రాజకీయాలకు అతీతంగా నాన్న మీద ప్రేమతో పాలుపంచుకోవాలనుకుంటే దాన్ని కూడా పెద్ద మనసుతో ఆహ్వానిద్దాం. నాన్న చనిపోతూ ఈ రాష్ట్రంలో అతిపెద్ద కుటుంబంలో నన్ను ఒక సభ్యుడిని చేసిపోయారు. తమ్ముడిలా నన్ను ఆదరించిన ప్రతి కుటుంబ సభ్యుడి ఆప్యాయతలో పాలుపంచుకునేందుకు వస్తున్నాను. కాబట్టి ఈ కార్యక్రమం రాజకీయాలకు అతీతంగా, పార్టీలకు అతీతంగా కేవలం వ్యక్తిగత పర్యటనగా మాత్రమే భావించవలసిందిగా హృదయపూర్వకంగా ప్రార్థిస్తున్నాను.